Да Міжнароднага дня роднай мовы

21 лютага ў свеце адзначаецца Міжнародны дзень роднай мовы.

Cёння у свеце шмат цудоўных моў. Адны з іх вабяць сваёй прыгажосцю і непаўторнасцю, другія – мілагучнасцю. Але ў кожнага чалавека ёсць толькі адна родная мова, якая завецца роднай. Менавіта на гэтай мове ён размаўляе з роднымі, сябрамі, знаёмымі. І вельмі дрэнна, калі чалавек пачынае забывацца на сваю мову, не шануе яе.

Дзень роднай мовы асаблівы для кожнай нацыі, кожнага народа, бо няма народа без мовы, няма мовы без яго носьбіта.

У бібліятэках дзяржаўнай установы “Цэнтралізаваная сетка публічных бібліятэк Слаўгарадскага раёна” прайшоў шэраг мерапрыемстваў, прысвечаных гэтай даце. Галоўная мэта мерапрыемстваў – выклікаць цікавасць да беларускага слова, роднай мовы, прыцягнуць увагу падрастаючага пакалення да таго багацця, якім валодае кожны, хто размаўляе на беларускай мове, а таксама спрыяць фарміраванню маўленчай культуры чытачоў, іх творчаму ўспрымання мастацкіх твораў.

У Новаслабодскай БФ для хлопчыкаў і дзяўчынак была праведзена гульня-падарожжа «Фальклорная мазаіка». Падчас мерапрыемства дзеці пазнаёміліся з беларускімі прыказкамі, скарагаворкамі і прыметамі. Даведаліся, што гэтыя кароткія моўныя выразы ўзбагачаюць нашу мову, робяць яе яснай і паэтычнай. Таксама дзеці з задавальненнем адгадвалі загадкі, успаміналі любімыя беларускія словы. У завяршэнні, рабятам была прадстаўлена кніжная выстава «Чытаем на роднай мове», дзе былі змешчаны слоўнікі, даведнікі па арфаграфіі і пунктуацыі, зборнікі твораў беларускіх пісьменнікаў, прысвечаныя роднай мове.

Бібліятэкар Лапаціцкай БФ правяла акцыю “Слава кніжцы беларускай”. Наведвальнікі бібліятэкі знаёміліся з сучаснымі беларускімі аўтарамі і іх творамі, а таксама з задавальненнем выбіралі кнігі беларускіх класікаў для хатняга чытання.

Дзень роднай мовы “Адкуль наш род і наша мова” прайшоў у Бальшазімніцкай БФ. Шмат цікавага і займальнага даведаліся дзеці, удзельнікі дзіцячага клуба “Гномікі”, пра беларускую мову з кніг, прадстаўленых на выставе ў бібліятэцы. Гэта ўсімі любімыя кнігі беларускіх пісьменнікаў В. Віткі, У Ліпскага, З. Бядулі, Н. Галіноўскай і іншых. Дзеці пазнаёміліся з гісторыяй свята, даведаліся аб разнастайнасці розных моў свету, успомнілі прыказкі, крылатыя выразы на беларускай мове, прымалі удзел у гульні “Знаўца роднай мовы” (больш падрабязней глядзі на сайце за банэрам “Проект “Растим патриотов Отчизны своей” https://lib-slavgorod.mogilev.by/rastim-patriotov-otchizny-svoej-3/).

У Васькавіцкай БФ для дзяцей быў праведзены ўрок роднай мовы “Чытаем словы роднае, беларускае”, а таксама аформлена тэматычная выстава пад агульнай назвай.